Трэнінг “Сучасныя падыходы да мовы варожасці” адбыўся ў Брэсце

Як распавёў прадстаўнік Human­Con­stan­ta Аляксей Казлюк, “мова варожасці” (hate­speech) ёсць сур’ёзнай праблемай сучаснасці, а небяспека гэтай з’явы палягае ў тым, што яе лёгка недаацаніць, а яшчэ прасцей не заўважыць. У той жа час сама з’ява можа ўплываць на людзей і быць ініцыятарам нянавісці ў грамадстве.

Удзельнікі трэнінга пагадзіліся з высновай, што так ці інакш, “мова варожасці” прысутнічае ў паўсядзённым жыцці кожнага з нас незалежна ад таго, ці жадаем мы гэта прызнаваць. Бо распальванне нянавісці, расавая дыскрымінацыя, ксенафобія, антысемітызм, любыя іншыя праявы варожасці (напрыклад, у дачыненні да нацыянальных меншасцяў ці мігрантаў) таксама мае дачыненне да “мовы варожасці”.

Што тычыцца працы журналістаў, дык існуе вельмі тонкая мяжа паміж свабодай выказвання і лексікай нецярпімасці. Больш за тое, гэта звязана з розным узроўнем культурных, рэлігійных і сацыяльных традыцый, ступенню талерантнасці, інфармаванасці і развітасці грамадства. Як маглі пераканацца сябры брэсцкай філіі ГА “Беларуская асацыяцыя журналістаў”, што бралі ўдзел у трэнінгу, тэма набывае асаблівую актуальнасць у іх горадзе, калі прадстаўнікі СМІ рыхтуюць рэпартажы ці аналітычныя матэрыялы наконт уцекачоў, якія праз Брэст імкнуцца трапіць на Захад.

Падчас мерапрыемства і журналісты, і іншыя удзельнікі сустрэчы змаглі атрымаць досвед, як распазнаваць свабоду выказвання ад “мовы варожасці”, даведацца аб формах і відах нецярпімасці, атрымаць веды аб тым, як не стаць ахвярай або распаўсюднікам нянавісці, а таксама зразумець прычыны з’яўлення “мовы варожасці”, прапаганды нецярпімасці і ўплыў іх на грамадства.