У праваабаронцы Алеся Бяляцкага ў зняволенні пагаршаецца стан здароўя

61-гадовы палітзняволены кіраўнік Праваабарончага цэнтру «Вясна» і нобелеўскі лаўрэат Алесь Бяляцкі ўтрымліваецца за кратамі ўжо 1000 дзён. Жонка палітвязня Наталля Пінчук распавяла Asso­ci­at­ed Press, што апошнія паўгода Бяляцкі знаходзіцца ў адзіночнай камеры, нягледзячы на свае хранічныя захворванні.

Алесь Бяляцкі падчас суда. 2023 год. Фота: sb.by

«Ад людзей, якія выйшлі з турмы, мне стала вядома, што стан Алеся працягвае пагаршацца і ён не атрымлівае некаторыя неабходныя яму лекі», – сказала Наталля Пінчук.

Таксама яна заклікала ААН «дзейнічаць больш актыўна», каб дапамагчы Бяляцкаму і іншым палітзняволенымі ў Беларусі.

Алесь разам з калегамі  Валянцінам Стэфановічам і Уладзімірам Лабковічам быў затрыманы 14 ліпеня 2021 года. Праваабаронцаў абвінавацілі ў «кантрабандзе» і «фінансаванні групавых дзеяннях, якія груба парушаюць грамадскі парадак».

3 сакавіка 2023 года суддзя Марына Запаснік прысудзіла «вясноўцам» вялікія тэрміны: Уладзю — 7 гадоў калоніі, Валянціну — 9 гадоў калоніі, Алесю — 10 гадоў калоніі. Праваабаронцы не прызналі віну ні па адным артыкуле, які ставіўся ім у віну.

Алесь пяць разоў вылучаўся на Нобелеўскую прэмію міру, а восенню 2022 года стаў яе лаўрэатам.