У Брэсце зноў абмежавалі доступ журналістаў на судовы працэс
1 лютага 2019
У судзе Ленінскага раёна Брэста 1 лютага агучаны прысуд паводле справы двух супрацоўнікаў міліцыі, якія абвінавачваліся ў махлярстве, перавышэнні ўлады, а таксама крадзяжы шляхам злоўжывання службовымі паўнамоцтвамі. Шэраг журналістаў ахоўнікі не прапусцілі асвятляць працэс з-за “недахопу месцаў” у зале.
Як стала вядома службе маніторынгу ГА “Беларуская асацыяцыя журналістаў”, яшчэ да пачатку судовага пасяджэння невядомыя асобы ў цывільным занялі залу, дзе мусіў быць абвешчаны прысуд. Пасля гэтага супрацоўнікі міліцыі пачалі абмяжоўваць доступ людзей у гэтае памяшканне, спаслаўшыся на недахоп месцаў.
Было заўважана, што абмежаванні ў першую чаргу тычыліся тых, хто мог зрабіць фота- і відэазапіс з залы суда. У выніку на судовы працэс не здолелі трапіць журналістка інфармагенцтва БелаПАН Мілана Харытонава, блогер Сяргей Пятрухін, а таксама праваабаронца Уладзімір Вялічкін.
Акрамя таго, міліцэйскі канвой не даваў рабіць фотаздымкі тым, хто ўсё ж патрапіў у залу пасяджэнняў.
Нагадаем, што на гэтым тыдні ў судзе Брэсцкага раёна сябру ГА “БАЖ”, журналісту мясцовага сайта “Першы рэгіён” Алегу Супрунюку таксама не дазволілі наведаць судовы працэс па рэдакцыйным пасведчанні, спаслаўшыся, што падставай для пропуску можа быць толькі пашпарт.
@bajmedia
Журналистам станет еще труднее получить информацию из-за новых правил обращений в госорганы
27.12.2023
Раўнабедраны трохкутнік. У Вільні праходзіць форум свабоднай журналістыкі
07.12.2023
Падкаст Свабоды «Архіпэляг БЕЛАГ» — у фінале прэстыжнага міжнароднага конкурсу
24.09.2024
У Віцебску Барыса Хамайду аштрафавалі на 600 рублёў. І прызначылі новы суд
02.02.2024
