Абнаўленні ў «экстрэмісцкім спісе»: акаўнты Дзмітрыя Гардона — цяпер ужо афіцыйна

Увечары 28 лютага Міністэрства інфармацыі абнавіла Рэспубліканскі спіс экстрэмісцкіх матэрыялаў.

Дзмітрый Гардон, 2021 год. Фота: facebook.com/nashlive.ua

Раней пра тое, што сацсеткі Дзмітрыя Гардона прызнаны «экстрэмісцкімі», паведамлялі Telegram-каналы, блізкія да сілавікоў. Цяпер на сайце ведамства дакладна пералічаны ўсе інтэрнэт-рэсурсы ўкраінскага журналіста, якія суд Цэнтральнага раёна Мінска 26 лютага прызнаў «экстрэмісцкай інфармацыйнай прадукцыяй:

• Telegram-канал «Дмитрий Гордон»,
• старонка ў Insta­gram «Дмитрий Гордон»,
• старонка ў Х «Дмитрий Гордон»,
• старонка ў Face­book «Дмитрий Гордон»,
• старонка ў Tik Tok «Дмитрий Гордон»,
• YouTube-канал «Дмитрий Гордон»,
• Cайт інтэрнэт-крамы «GORDON SHOP».

На сайце Мінінфарма пералічаныя і іншыя інфармацыйныя рэсурсы, што на мінулым тыдні былі абвешчаныя рашэннямі судоў «экстрэмісцкімі».

Сярод іх Tik­Tok-канал «Новости Беларуси — TUT BY» (ідэнтыфікатар @newsbelby). Ён прызнаны «экстрэмісцкім» рашэннем суда Вілейскага раёна Мінскай вобласці ад 27 лютага.

Суд Крупскага раёна Мінскай вобласці 27 лютага паставіў лічыць «экстрэмісцкім» акаўнт у Tik­Tok з назвай «info­bel» і ідэнтыфікатарм  @infobel_.

У адпаведнасці з рашэннем суда Цэнтральнага раёна Мінска ад 27 лютага ў Рэспубліканскі спіс экстрэмісцкіх матэрыялаў трапіла старонка ў Х з назвай Dżmit­ry Hurniević. Старонка мае ідэнтыфікатар x.com/humievic
і належыць беларускаму журналісту Дзмітрыю Гурневічу. Месяц таму суд Ленінскага раёна Брэста абвесціў «экстрэмісцкай» акаўнт журналіста ў Face­book.