У Сірыі збіраюцца судзіць прапагандыстаў Асада

«Мы пацвярджаем, што ўсе спецыялісты вайсковых сродкаў масавай інфармацыі, якія былі часткаю ваеннай і прапагандысцкай машыны зрынутага рэжыму Асада і проста ці ўскосна спрыялі прапагандзе яго злачынстваў і масавых забойстваў супраць сірыйскага народу, будуць падвергнуты справядліваму суду ў межах пераходнага рэжыму», – адзначаецца ў допісе. 

Галоўнаю мэтаю гэтага працэсу міністэрства назвала дасягненне справядлівасці і пакаранне ўсіх, хто быў датычны да злачынстваў супраць грамадзянаў Сірыі.

Нагадаем, што 7 снежня войскі сірыйскай апазіцыі захапілі тэлебачанне Сірыі і заявілі пра кантроль над Дамаскам і ўцёкі прэзідэнта Башара аль-Асада. Яны назвалі гэта «канцом эры несправядлівасці». 8 снежня сірыйскі кіраўнік пакінуў Сірыю і апынуўся ў Расеі, дзе папрасіў палітычнага прытулку. 

Ад моманту перавароту 1970 года ўладу ў Сірыі ўтрымлівала дынастыя аль-Асадаў. З 1971-га да 2000 года прэзідэнтам Сірыі быў бацька Башара аль-Асада Хафэз, а пасля ягонай смерці на чале краіны стаў сам Башар аль-Асад. Гэта адбылося ў выніку безальтэрнатыўнага рэферэндуму. На выбарах 2021 года Башара аль-Асада, паводле афіцыйных звестак, падтрымалі 95 % удзельнікаў галасавання.