Украіна ўвяла санкцыі супраць беларускай прапагандысткі

Прапагандыстка Белтэлерадыёкампаніі Анастасія Бенедзісюк трапіла пад персанальныя санкцыі Украіны. Адпаведны ўказ 11 красавіка 2025 года падпісаў Ўладзімір Зяленскі.

Анастасия Бенедисюк / sb.by

Уведзеныя санкцыі, сярод іншага, прадугледжваюць пазбаўленне ўкраінскіх дзяржузнагарод, блакіроўку актываў у краіне, абмежаванне гандлёвых аперацый, забарону распаўсюджвання медыя на тэрыторыі Украіны.

32-гадовая рэпарцёрка Анастасія Бенедзісюк працуе на тэлеканале «Первый информационный». Яна нарадзілася ў Ашмянах, там скончыла школу, а пасля пайшла на журфак БДУ. У 2022 годзе стала тварам антыўкраінскай прапаганды на БТ.

У жніўні 2022 года Бенедзісюк падманам узяла інтэрв’ю ў некалькіх былых каліноўцаў. Яна называла сябе журналісткай выдання Deutsche Welle і зладзіла цэлы маскарад: зняла акуляры, надзела парык і адмыслова загрымавалася для размовы. У сакавіку 2024 года менавіта Бенедзісюк брала інрэрв’ю ў палітзняволенай Паліны Шарэнды-Панасюк, піша Радыё Свабода.

З 2023 года Анастасія Бенедзісюк ўжо знаходзіцца пад санкцыямі Еўрасаюза.

У санкцыйны спіс таксама трапілі расійскія прапагандысты і ваенкоры, холдынг «Ньюс Медыя» (выданні Life, Mash, SHOT, Super), інфармацыйнае агенцтва News Front, выданні «Нове видання», Херсонка.Ру, EADay, Readovka.Ru, Pravda.Ru, «Инфорос», тэлерадыёкампанія «Таврия» і іншыя.

У Беларусі пад санкцыі Зяленскага таксама трапілі грамадскае аб’яднанне «Белорусский славянский комитет» і прыватная асветніцкая ўстанова па пытаннях гісторыі, права і сацыяльных адносін «СогласиеМедиа». Абедзве арганізацыі зарэгістраваныя ў Мінску.