Улады прадалі з аўкцыёну хату блогеркі Алены Янушкоўскай

Хату ў вёсцы Суйкава Віцебскага раёна прадалі з аўкцыёну за 18 511 рублёў. На продаж маёмасць актывісткі і блогеркі была выстаўлена за нясплочаныя ў Беларусі штрафы і падаткі. Сума запазычанасці складала 1436 рублёў 60 капеек, і праз гэта Алену Янушкоўскую пазбавілі адзінага жылля.

Хата Алены Янушкоўскай у вёсцы Суйкава Віцебскага раёна. Фота: сацсеткі

Аўкцыён адбыўся 30 чэрвеня, хату прадалі з першага разу,  распавяла Алена Янушкоўская:

«Найчасцей бывае такое, што маёмасць выстаўляецца на аўкцыён некалькі разоў, а тут адразу знайшліся новыя гаспадары. Гандляваліся паміж сабой два ўдзельнікі, хоць суседзі распавядалі, што ахвотных паглядзець, прыязджала шмат. Падчас аўкцыёну кошт хаты падвысіўся амаль у два разы, спачатку ён быў 10 700 рублёў.

Але нават і 18 з паловай тысяч — гэта кошт, істотна ніжэйшы за рынкавы. На пачатку 2000‑х, калі купляла гэтую хату, я заплаціла за яе амаль дзевяць тысяч долараў.

Будынак не новы, але ў ім чатыры пакоі. Побач — уласная студня, на падворку — гаспадарчыя пабудовы, лазня, паблізу сажалка. Агульная тэрыторыя — 25 сотак. Прычым хата стаіць у зацішным месцы на ўскрайку вёскі, а да Віцебска ўсяго тры кіламетры, добра ходзіць транспарт».

У гэтай хаце блогерка пражыла амаль 20 год. Некалі яна набывала жытло ў вёсцы адмыслова: хацелася з’ехаць з абласнога цэнтра, перасяліцца з невялікай кватэры ў больш прасторнае жытло. Наважыўшыся на пераезд, Алена Янушкоўская і не думала, што будзе змагацца за правы вясковых жыхароў, і што створыць відэаблог «Настоящая Беларусь», каб уздымаць праблемы сучаснай беларускай вёскі. Відэаблог стаў надзвычай папулярным пасля таго, як аўтарка запрасіла прыехаць да сябе ў вёску Аляксандра Лукашэнку — каб ён паглядзеў, як няпроста жывецца вяскоўцам.

У 2020 годзе блогерка вяла прамыя трансляцыі з мірных пратэстаў, яе неаднаразова затрымлівалі, каралі адміністрацыйнымі арыштамі і штрафамі. У лютым 2021 года Алена Янушкоўская з прычыны палітычнаматываванага пераследу была вымушаная з’ехаць з Беларусі. 

У лістападзе 2021 года Міністэрства інфармацыі ўключыла ў Рэспубліканскі спіс экстрэмісцкіх матэрыялаў некалькі відэаролікаў, размешчаных на  YouTube-канале «Настоящая Беларусь». У снежні 2022-га ў гэты спіс унеслі суполку «Настоящая Беларусь» у сацыяльнай сетцы «ВКонтакте», у красавіку 2023-га — суполку з такой самай назвай у «Одноклассниках», у лютым 2024 года — суполку «Настоящая Беларусь» у Face­book.