Журналістаў Ксенію Луцкіну, Сяргея Дубаўца і Змітра Лукашука ўзнагародзілі да Дня Волі

Аб’яднаны пераходны кабінэт ухваліў рашэнне аб узнагароджанні шэрагу выбітных асоб за ўнёсак у развіццё Беларусі.

Ксенія Луцкіна, Сяргей Дубавец і Зміцер Лукашук. У калажы выкарыстаныя фота «Нашай Нівы» і скрыншот эфіра «Еўрарадыё»

Такую пастанову напярэдадні Дня Волі — 21 сакавіка 2025 года — падпісала кіраўніца Кабінэта Сьвятлана Ціханоўская.

У пастанове зазначаецца, што Крыжом адраджэньня Беларусі (братоў Луцкевічаў) за шматгадовую працу і значны ўнёсак у нацыянальнае адраджэньне ўзнагароджваецца:

Сяргей Дубавец — беларускі журналіст, пісьменьнік, выдавец і грамадзкі дзеяч.

Мэдалём «За плённую працу на карысьць Беларусі» за выбітныя дасягненьні ў прафэсійнай і грамадзкай дзейнасьці ўзнагароджваюцца

• Віціс Юрконіс (Vytis Jurko­nis) — літоўскі палітоляг, выкладчык, кіраўнік літоўскага офіса Free­dom House;
• Павел Казанецкі (Paweł Leszek Kaza­nec­ki) — польскі палітоляг і праваабаронца, былы кіраўнік Усходнееўрапейскага дэмакратычнага цэнтра;
• Зьміцер Лукашук — беларускі журналіст і радыёвядоўца;
• Павал Лібэр — IT-экспэрт, прадпрымальнік, заснавальнік шэрагу грамадзкіх ініцыятыў у лічбавай сфэры.

Мэдалём Францішка Скарыны за высокія дасягненьні ў дзейнасьці ўзнагароджваецца:

• Лявон Вольскі — беларускі музыка, літаратар, мастак і грамадзкі дзеяч.

Мэдалём Няскораных (Ларысы Геніюш) за стойкасьць і годнасьць, праяўленыя ў зьняволеньні, узнагароджваецца:

• Ксенія Луцкіна — беларуская журналістка, былая супрацоўніца Белтэлерадыёкампаніі.

Мэдалём «Гонар і годнасьць» за рызыку сваім жыцьцём у змаганьні за свабоду, нацыянальныя каштоўнасьці, дэмакратыю і правы чалавека ўзнагароджваецца:

• Аляксандр Варапаеў — юрыст, палкоўнік юстыцыі ў адстаўцы.

Выканаўцу абавязкаў прадстаўніка  Аб’яднанага пераходнага кабінэта па нацыянальным адраджэньні Паўлу Баркоўскаму даручылі арганізаваць урачыстыя цырымоніі.