Віцебская газета перарабляе крытычныя каментары пра выбары на станоўчыя :)

Пад рубрыкай  “Чаго вы чакаеце ад новага складу Палаты прадстаўнікоў?”  размешчаны ўсяго адзін артыкул пад аднайменнай назвай. Аўтары пацікавіліся меркаваннямі не шараговых гараджан, а дзяржаўных службоўцаў – прарэктара адной з ВНУ, начальніка віцебскай гарадской інспекцыі прыродных рэсурсаў і аховы навакольнага асяроддзя, старшыні гарадскога аб’яднання Федэрацыі прафсаюзаў Беларусі.

А таксама думкамі намесніка старшыні гарадскога савета ветэранаў і ўдзельніцы Вялікай Айчыннай вайны, сфармуляванымі ў артыкуле наступным чынам: “Депутатский корпус республики зарекомендовал себя с наилучшей стороны.  Мы привыкли к тому, что в национальном парламенте работают люди компетентные и неравнодушные к судьбе страны, к своим избирателям. Очень важно, чтобы такими же качествами обладали и депутаты шестого созыва. Впрочем, это во многом зависит от нас, избирателей”.

Можна было б засумнявацца, ці насамрэч спадарыня паважнага веку так віртуозна валодае стылем маўлення чыноўніка з вялікім стажам выступаў “за трыбунай”. І замест пошукаў адказу на гэтае пытанне жыхарка Віцебску вырашыла паэксперыментаваць, ці надрукуе газета звычайны “голас народа”.

Маці траіх дзяцей, якая вырашыла падпісаца проста – “Мама”, паспрабавала скарыстацца магчымасцю і распавесці пра свае чаканні ад будучых дэпутатаў. Аднак высветлілася, што тэхнічнымі магчымасцямі сайта гэта не прадугледжана. Заставалася адно – пакінуць каментар да згаданага вышэй артыкула.

Апавядае спадарыня Алена:
“Я даслала каментар прыкладна такога зместу: “Жду, что они будут создавать законы на благо народа, а не для себя лично. И жду, что они будует настоящими слугами народа, а не дармоедами». Нічога абразлівага ў маіх словах не было, і я выказала меркаванне, неаднаразова мною чутае і ад іншых людзей… Як толькі я даслала свой каментар, як прыйшло паведамленне, што яго будзе глядзець мадэратар. Ужо тады ў мяне закраліся сумневы, ці будуць надрукаваныя мае словы. Але вырашыла не пераймацца: няхай, думаю, мадэрацыя будзе, раптам нехта напіша нейкае брыдкаслоўе ці лаянку… Насамрэч аказалася, што мадэратар  проста перайначыў мае словы, выкінуўшы лішнія, на ягоную думку, словы. Атрымалася такое:  “Жду, что они будут создавать законы на благо народа и настоящими слугами народа”.

Замест незадаволенага атрымаўся ўхвальны каментар, адзначае спадарыня, якая хацела скарыстацца нібыта дэмакратычнай прапановай газеты і сваім правам на свабоду думкі і выказванняў. На дадзены момант – ён увогуле адзіны. Ці то чытачы “Віцьбічаў” не давяраюць газеце сваіх думак, ад пачатку не паверыўшы ў тое, што іх надрукуюць. Ці ўвогуле не разумеюць “фармату” прапановы: з аднаго боку, газета нібыта заклікае адгукнуцца, распачаўшы асобную рубрыку, а з другога – зрабіць гэта праблематычна і з тэхнічнага боку, і праз праблему цэнзуравання каментароў.

Да слова, віцебская абласная газета “Витебские вести“ увогуле адключыла магчымасць для каментавання шэрагу артыкулаў на сайце, у тым ліку і на выбарчую тэматыку.