YouTube і Facebook усё ж такі не СМІ. У Брэсце адменена пастанова суда ў дачыненні да блогераў

12 сакавіка суд першай інстанцыі пакараў штрафам Кабанава і Пятрухіна на 40 базавых велічыняў кожнага (980 рублёў). Суддзя Пінска і Пінскага раёна Вольга Лубнік зрабіла выснову, што яны вінаватыя ў незаконным вырабе і распаўсюдзе прадукцыі СМІ (ч. 2 арт. 22.9 КаАП). Гаворка ідзе пра анлайн-трансляцыі, якія блогеры рабілі на прахадной завода па вытворчасці акумулятараў ў Пінску.

Пасля вывучэння пісьмовых матэрыялаў гэтай справы і касацыйнай скаргі, а таксама выслухаўшы тлумачэнні пазоўнікаў, суддзя Брэсцкага абласнога суда Руслана Сянько адмяніла пастанову суда першай інстанцыі. Такім чынам, штрафы, якімі пакаралі блогераў, ануляваныя.

Па словах Сяргея Пятрухіна, сённяшняе судовае рашэнне ён лічыць прадказальным:

“Гэта быў бы нонсенс, калі б і абласны суд засведчыў, што YouTube і Face­book з’яўляюцца сродкамі масавай інфармацыі, а таму кожнага, хто выкладвае відэа ў сацыяльныя сеткі, варта лічыць распаўсюднікам прадукцыі СМІ”, — кажа брэсцкі блогер.

На яго думку, калі б гэтая справа дайшла да Вярхоўнага суда, яна б атрымала яшчэ большы розгалас і мела б непрадказальныя наступствы для інтэрнет-супольнасці Беларусі.

Варта дадаць, што суддзя Брэсцкага аблсуда Руслана Сянько тыдзень таму разглядала іншую касацыйную скаргу Сяргея Пятрухіна, калі ён дамагаўся адмены пастановы Ленінскага райсуда Брэста ад 28 лютага 2018 года. Тады блогер быў прызнаны вінаватым у здзяйсненні правапарушэння па частцы 3 артыкула 23.34 КаАП (“Парушэнне парадку арганізацыі або правядзення масавых мерапрыемстваў”). Аднак тое рашэнне абласны суд пакінуў без зменаў.

Фота “Брестская газета”