«Экстрэмісцкі» спіс Мінінфарма: YouTube-канал «Беларусь live», Telegram-чат «Витебск, я гуляю» і іншыя

Міністэрства інфармацыі Беларусі 20 сакавіка абнавіла Рэспубліканскі спіс экстрэмісцкіх матэрыялаў.

Выява створана БАЖ з выкарыстаннем Chat­G­PT

Рашэннем суда Ленінскага раёна Магілёва ад 17 сакавіка 2025 года «экстрэмісцкай інфармацыйнай прадукцыяй» прызнаны YouTube-канал «Беларусь live» (ідэнтыфікатар youtube.сom/@Belarus_live).

Гэты канал мае больш за 37 тысяч падпісчыкаў і прэзентуе сябе як рэтранслятар навін з Беларусі і постсавецкай прасторы.

18 сакавіка 2025 года суд Ленінскага раёна Гродна прызнаў «экстрэмісцкай» суполку ў Telegram з назвай «ЧАТ Витебск, я гуляю!» (ідэнтыфікатар t.me/vitebsk_info_chat). Забароненым для распаўсюду стаў таксама лагатып рэсурса і любы візуальны матэрыял, які ўтрымлівае тэкст «ЧАТ Витебск, я гуляю!».

Гэты Telegram-чат — адзін з інтэрнэт-рэсурсаў аднайменнага праекта, накіраванага на асвятленне падзей у рэгіёне, у тым ліку палітычных і эканамічных.

У той самы дзень суд Ленінскага раёна Гродна прызнаў «экстрэмісцкім» яшчэ адзін рэсурс, які транслюе беларускія навіны — Telegram-суполку «Стромкае піке» ( ідэнтыфікатар t.me/BelBroiler747). Таксама разам з лагатыпам, які ўтрымлівае тэкст «BEL FLYING NEWS», і «візуальным матэрыялам» — тэкстам «Стромкае піке», размешчаным на любых магчымах носьбітах.

Суд Баранавіцкага раёна і горада Баранавічы 18 сакавіка 2025 года прызнаў «экстрэмісцкімі матэрыяламі» адразу некалькі суполак у сацыяльнай сетцы «Одноклассники», дзе размяшчаюцца навіны з Беларусі і свету. Паводле рашэння суда ў Рэспубліканскі спіс экстрэмісцкіх матэрыялаў унесеныя суполкі:

• «Г.Пинск 85рп 1985–1989г.г.» (ідэнтыфікатар ok.ru/group/53851291189260),
• «Есть такие Чудесные Люди» (ідэнтыфіктар ok.ru/group/56989529014413),
• «Брест. Вчера и Сегодня» (ідэнтыфікатар ok.ru/brest.vche).