ЮНЕСКА будзе больш пільна сачыць за ўціскам журналістаў у Беларусі?

На канферэнцыі падчас Сусветнага дня свабоды СМІ ў Рызе быў прыняты дакумент, які можа непасрэдна адбіцца на Беларусі.

У так званай Рыжскай дэкларацыі лейтматывам праходзіць праблема журналісцкай бяспекі. А таксама акцэнт робіцца на санкцыях у дачыненні да дзяржаў, якія журналістаў прыціскаюць.

Дэлегаты канферэнцыі сышліся ў меркаванні, што свабодныя СМІ — гэта наймацнейшы інструмент, які спрыяе пераўтварэнням ў грамадстве. Адпаведна праблемнае існаванне незалежных медыяў стрымлівае краіны ад развіцця.

“Журналістыка спрыяе верхавенству законаў, пільнасці супраць карупцыі, заахвочванню да палітычных дэбатаў, здольнасці грамадзян да прыняцця абаснаваных рашэнняў. Журналістыка спрыяе, каб людзі актыўна ўдзельнічалі ў грамадскіх справах”, — сказана ў Рыжскай дэкларацыі.

Традыцыйна час прэзідэнцкіх выбараў у Беларусі робіцца для беларускіх СМІ неспакойным. Журналістаў затрымліваюць, доступ да інфармацыі ім часта абмяжоўваюць, а фрылансеры ўвогуле пазбаўленыя легальнасці.

ЮНЕСКА просіць паведамляць пра канкрэтныя выпадкі парушэнняў.