З‑за кратаў вызвалілі блогера Паўла Вінаградава

Беларускія ўлады вызвалілі грамадскага актывіста, блогера, тэлевядоўцу Паўла Вінаградава. Гэта адбылося сёння, 11 верасня, пасля візіту ў Мінск прадстаўніка амерыканскага прэзідэнта Джона Коўла.  Усяго ў гэты дзень на волю па памілаванні выйшлі 52 палітычныя вязні, іх вывезлі з Беларусі ў Літву.

Блогер Павел Вінаградаў пасля вызвалення. Вільня, 11 верасня 2025 года. Фота: «Позірк»

Паўла Вінаградава затрымалі 22 снежня 2021 года ў Беразіне (Мінская вобласць), дзе ён жыў з сям’ёй. За допіс у Face­book Паўла абвінавацілі паводле трох крымінальных артыкулаў: арт. 130 КК (распальванне расавай, нацыянальнай, рэлігійнай або іншай сацыяльнай варожасці), арт. 342 (арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх), арт. 387 КК (паклёп на прэзідэнта).

Суд над Паўлам Вінаградавым распачаўся 10 сакавіка 2022 года ў Мінскім абласным судзе і праходзіў у закрытым рэжыме. Прысуд абвесцілі 16 сакавіка 2022 года — пазбаўленне волі на 5 гадоў з адбыццём у калоніі ва ўмовах агульнага рэжыму.

У калонію ў Ваўкавыску Павел Вінаградаў быў накіраваны ўлетку 2022 года, але неўзабаве стала вядома, што ён захварэў на сухоты — палітвязня перавялі ў Оршу ў спецыялізаваную калонію № 12, дзе ўтрымліваюць асуджаных, якія хварэюць на туберкулёз. К таму часу малады мужчына рэзка страціў вагу — схуднеў на 36 кілаграмаў. Нягледзячы на гэта, адміністрацыя ПК-12 кідала яго ў ШЫЗА і ПКТ. Па завяршэнні курсу лячэння ў ПК-12 ў лютым 2023 года яго вярнулі ў ваўкавыскую калонію.

Яшчэ ў СІЗА пры жодзінскай турме, дзе Паўла ўтрымлівалі да суда, яго паставілі на ўлік як «схільнага да захопу закладнікаў, нападу на адміністрацыю і хуліганскіх праяў». Падчас следства таксама трымалі тыдзень у штрафным ізалятары.

Павел Вінаградаў да затрымання

У пачатку снежня 2023 года стала вядома, што палітзняволенага хочуць перавесці на турэмны рэжым. У судзе Ваўкавыскага раёна 6 снежня адбыўся суд па замене палітвязню рэжыму ўтрымання на турэмны. Па рашэнні суддзі Мікалая Сяргейкі, Паўла перавялі ў турму № 1 у Гродне.

Грамадскі актывіст стаў палітвязнем другі раз. Пасля прэзідэнцкіх выбараў 2010 года яго асудзілі на 4 гады зняволення па абвінавачанні ва ўдзеле ў пратэстах.

Павел Вінаградаў — адзін з рэкардсменаў у прэвентыўных затрыманнях, яго затрымлівалі літаральна перад усімі масавымі мерапрыемствамі ў Беларусі.