Запрацаваў сайт-каталог беларускіх відэа на YouTube

Пачаў працу праект Bra­ma — анлайн-каталог відэа на YouTube, створаных у Беларусі або беларусамі за мяжой. Пра гэта паведаміў стваральнік рэсурсу Вячаслаў Радзівонаў на сваёй старонцы ў Face­book.

Скрыншот: brama.online

«Ідэя з’явілся даўно, падчас размовы ў адным з чацікаў. Нехта сказаў, што на YouTube мала беларускага кантэнту. Я вырашыў аспрэчыць. Відэа, створаных беларусамі ці па-беларуску, шмат, але праз асаблівасці альгарытмаў YouTube яны часта не трапляюць да зацікаўленага гледача. Так ствараецца заганнае кола для беларускіх аўтараў: мала гледачоў, не хапае магчымасцяў для развіцця, сканчаецца імпэт, мала гледачоў… У выніку каналы хутка закрываюцца», — піша аўтар праекту.

Вячаслаў Радзівонаў тлумачыць, што YouTube працуе так, каб прасоўваць відэа, якія спадабаюцца максімальна шырокаму колу людзей. У выніку алгарытмы могуць раіць ролікі, якія папулярныя ў суседніх краінах ці ў людзей з іншымі густамі. Нават падпісваючыся на беларускія каналы, гледачы могуць не ведаць, што існуюць іншыя падобныя рэсурсы.

Задача праекта Bra­ma — зрабіць вялікі і зручны каталог, каб дапамагчы знайсці беларускія відэа. Усе каналы ў каталогу падзелены па катэгорыях. А тыя каналы, якія маюць кантэнт на розную тэматыку, разбітыя на асобныя праграмы. Дадзеныя абнаўляюцца аўтаматычна ў рэжыме рэальнага часу.

«У мяне няма ілюзій, што гэты каталог будзе вельмі папулярным ці заменіць для кагосьці хатнюю старонку YouTube. Але, магчыма, камусьці дапаможа знайсьці нешта новае беларускае», — дадае Вячаслаў Радзівонаў.  

Першая публічная версія Bra­ma пачала працаваць 1 красавіка 2024 года. Зараз сайт знаходзіцца ў стадыі бэта-тэставання. Сачыць за развіццём праекта можна ў Twit­ter ці Telegram.