Затрыманы журналіст Кірыл Пазняк
13 верасня 2025
Як стала вядома «Позірку», 4 верасня, у дзень прызнання «экстрэмісцкім фармаваннем» ютуб-канала «Платформа 375», затрыманы прызнаны датычным да яго журналіст Кірыл Пазняк.
Журналіст Кірыл Пазняк. Скрыншот відэа
Рашэнне прызнаць “экстрэмісцкім” канал, зарэгістраваны ў красавіку 2021 года, які мае 4,05 тыс. падпісчыкаў і 3,41 млн праглядаў, у тым ліку эфіраў з удзелам праўладных прапагандыстаў, прыняў Камітэт дзяржбяспекі. З таго ж дня рашэнне прызнана такім, што набыло моц. У “Пералік арганізацый, фарміраванняў, індывідуальных прадпрымальнікаў, якія маюць дачыненне да экстрэмісцкай дзейнасці“ канал, а таксама яго акаўнты ў “ЦікТоку“ ўключаны 11 верасня. “Платформа 375“ стала 311‑м “экстрэмісцкім фарміраваннем”.
За два дні да рашэння КДБ, 2 верасня, суд Партызанскага раёна Мінска прызнаў канал “экстрэмісцкімі матэрыяламі”.
У 2021–2022 гадах канал правёў некалькі дэбатаў паміж праўладнымі прапагандыстамі і іх апанентамі, якія вымушана з’ехалі з краіны. Апошні эфір адбыўся 3 снежня 2022 года з удзелам Рыгора Азаронка (СТБ), Юрыя Цераха (“СБ. Беларусь сегодня“) — у Мінску, а таксама Алега Талерчыка (сузаснавальнік арганізацыі былых супрацоўнікаў сілавых структур ByPol) і Дзяніса Дудзінскага (тэлевядучы, шоўмэн) — у Варшаве.
@bajmedia
