Журналісцкая салідарнасць — па-за адлегласцю!

Офіс БАЖ наведалі першая сакратар Нацыянальнага саюза журналістаў Украіны Ліна Кушч і каардынатарка Харкаўскага цэнтру журналісцкай салідарнасці Ганна Чарненка, якія гэтымі днямі знаходзяцца ў Вільні для ўдзелу ў мерапрыемствах да Дня свабоды прэсы.

Намеснік старшыні БАЖ Барыс Гарэцкі, першая сакратар Нацыянальнага саюза журналістаў Украіны Ліна Кушч, каардынатарка Харкаўскага цэнтру журналісцкай салідарнасці Ганна Чарненка і старшыня БАЖ Андрэй Бастунец. Вільня, 7 траўня 2025 года. Фота: БАЖ

Ліна Кушч — адна з кіраўнікоў НСЖУ. Яна актыўна дапамагала беларускім журналістам і журналісткам падчас экстраннага выезду з Беларусі ва Украіну ў 2021‑м годзе. Ганна Чаргенка — журналістка з Харкава, матэрыял з якой БАЖ рабіў у мінулым годзе, калі наведваў прыфрантавы горад.

БАЖ і НСЖУ актыўна падтрымліваюць адно аднаго на міжнароднай арэне, намагаючыся захоўваць увагу міжнароднай супольнасці на нашым рэгіёне.

— Вайна, якую Расія вядзе супраць Украіны, вельмі адчувальная да многіх беларускіх калег. Мы разам сустрэлі поўнамаштабны напад у Кіеве. БАЖ лічыць важным дапамагаць украінскім калегам, беларускія журналісты актыўна асвятляюць вайну, расказваючы свету праўду пра яе. У сваю чаргу ўкраінскія журналісты — калегі, якія выказвалі максімальную салідарнасць і падтрымку беларусам пасля падзеяў 2020-га года, — гаворыць пра цёплыя стасункі намеснік старшыні БАЖ Барыс Гарэцкі.