Журналісты наведалі Чарнобыльскую АЭС (+ шмат фота)

Восем сябраў асацыяцыі з Гомеля, Мінска, Брэста, Пінску, Гродна азнаёміліся з побытам  жыхароў вёскі Гдзень Брагінскага раёну, якую пасля катастрофы на ЧАЭС двойчы адсялялі, але там і цяпер жыве  каля сотні самасёлаў, у тым ліку два дзясяткі дзяцей. Пра іх лёс, занятак і спадзяванні журналісты раскажуць у сваіх рэпартажах, артыкулах і відэасюжэтах.

18 красавіка прэс-тур сябраў ГА «БАЖ» працягваўся ва Украіне. На кантрольна-прапускным пункце Дзіцяткі, за два дзясяткі кіламетраў ад Чарнобыля, беларускіх журналістаў сустрэлі, паводле дамоўленасці, прадстаўнікі Дзяржаўнага агенцтва Украіны па кіраванні зонай адчужэння. Пасля патройнай праверкі БАЖаўцы патрапілі ў Чарнобыль, на АЭС і ў выселены горад атамшчыкаў Прыпяць. Суправаджаў удзельнікаў прэс-тура ўраджэнец Беларусі, інжынер, каардынатар ратавальных службаў пры надзвычайных сытуацыях Уладзімір Вярбіцкі.

Журналісты пабычылі на ўласныя вочы будаўніцтва новага саркафага для дадатковага ўкрыцця чацвёртага энэргаблоку АЭС, які ўзарваўся 26 красавіка 1986 года. У выніку землі Украіны, Беларусі, Расіі аказаліся заражанымі радыяцыяй. Радыяцыйныя аблокі два разы абагнулі зямны шар.

Праз чарнобыльскую катастрофу беларусы зведалі эвакуацыю, розныя захворванні — найперш на рак шчытападобнай залозы. Падлічана, што эканамічны ўрон ад чарнобыльскай катастрофы ў Беларусі склаў 32 гадавых бюджэты.

“Значны і карысны прэс-тур, — лічыць  сябра ГА «БАЖ», рэдактарка газеты “Вячэрні Гродна” Інэса Максімчык. — Чарнобыль павучальны для ўсіх краін, хто мае ці збіраецца мець атамныя станцыі”.

На выездзе з ЧАЭС удзельнікі прэс-туру прайшлі падвойны дазімітрычны кантроль.